ياريتنى كنت لسه صغيرة

ياريتنى كنت لسه صغيرة

مفيش حد فينا مبيحنش لأيام زمان ويسرح ويضحك لما يفتكر مواقف هبلة كان بيعملها وهو صغير بس الأهم إنك تسمع أغنية "ساعات بشتاق" لمحمد فؤاد

هتفتكر كل حاجة حلوة يمكن حلاوتها عشان كنا عايشين ببراءة مفيش مسئولية مكنش إدراكنا للأمور زى دلوقتى ،،أحلى حاجة كانت من عمر فات وذكريات لما يجى رمضان وتيجى لمتنا الحلوة مع اهالينا وكل واحد قبل رمضان يفتكر كان مزعل مين ومخاصم مين عشان يصالحه عشان ربنا ميزعلش منه تسمع الآذان وتلاقيه ليه طعم تانى فى رمضان والناس كتيرة بتصلى اللى دلوقتى تلاقى الجامع فاضى وناس فطرانة عادى جدا فى رمضان ،، كنت تحس ساعتها بحلاوة الوقت لماتعلق الزينة مع اصحابك وجيرانك ،، تروح تجيب خيط وورق ابيض وجلاد وماية وطحينة وتلزقهم على الخيط وترميهم للجيران يعلقوه وتلاقى الشوارع كلها زينة وتلاقى فوانيس منورة وكبيرة تستنى فوازير نيللى او شريهان والف ليلة وليله "فاطيما وحليمة وكاريمة" وتقعد تقلد حليمة على قد ما كانت الحلقة قصيرة بس كنت تحس بجمالها وعلى قد ماكانت الاعلانات بتزيد فى رمضان ومكنتش بالصورة البشعة اللى بنشوفها الايام دى اعتقد يحولوا التليفزيون ويسموه شاشة اعلانات ،، افتكرت مرة الممثل العظيم محمد صبحى لماكان يتعرضلوا مسلسل  وكان شارط ميتقطعش مسلسله باعلانات عشان ميحصلش تشتيت للمشاهد وكانت النتيجة عرضوله مسلسله على القناة التالتة  وكمان فى اوقات القيلولة ،، اعلانات رمضان زمان كانت جميلة اوى وكان مرة جه إعلان اسمه ايزى موزو عصير اترفع ومبقاش يتعرض وكان الواحد يكسف ينزل يشتريه عشان البنات كانوا بيقولوها بصورة مثيرة ،، دلوقتى بقى عادى انك تقعد فى بيتك وتسمع الفاظ فى مسلسل تليفزيونى تشمئز لها اذناك وافلام عادى جدا تعرض حاجات مش كويسة وعارف من الاعلانات انها مش كويسة وتدخل الفيلم عادى.

عاوزين تعرفوا قد ايه اتغيرنا وان فى فجوة فى جيل التمانيات والالفية "هاتوا فيلم عربى قديم وفيلم عربى جديد معروض وانتوا تعرفوا حتى التيت اللى كانت بتتحط زمان لواتقال لفظ مش كويس اتشالت وبقت a؟a مقولة شهيرة الآن واغلب الناس بقت تقولها.

افتكر لما كنت صغيرة وعاوزة اصوم رمضان ويضحكوا عليا ويقولوا استنى لغاية اذان العصر وافطرى قد ايه كنا عيال

افتكر المسحراتى واقول لبابا خليه يقولى اسمى يابابا عشان يصحينى مانا اساسا صاحية

افتكر المدرسة والمدرسين واول حفلة اشتركت فيها افتكر لما المدرسين يقولولنا محدش يشترى حاجة من بره عشان ملوثة محدش يصفر عشان الصفير من الشيطان ،، افتكر جرس الفسحة افتكر ال8 حصص وكل حصة ساعة الا ربع  وطابور المدرسة وتحية العلم والدعاء اللى كان يتقال يوميا فى رمضان

وافتكر لما كان مدرس يقول انتى حمارة اعيط معلش كنت حساسة اوى وازعل ويصالحنى

افتكر لما مدرسة قالت حطوا كلمة الله فى جملة فقلت "إن الله حى لايموت" والكل سقفلى

افتكر انى كنت برسم حلو اوى وان مدرسة الرسم اخدت منى كرستين انا رسماهم ومكسبتش حاجة وضاعت رسوماتى

افتكر لما مدرس اللغة العربية الله يرحمه قال ياجماعة لازم نكلم عربى ، اللغة العربية هى الأصل قلت والله لأطبق ده " اروح اقول للبقال اريد سامبا بيضاء واكررها تلات مرات وفى الاخر قلتله عندك سامبا بيضا قالى ولا حمراء "

افتكر ان صحبة واحدة بس فضلت من المدرسة معايا لغاية الآن

افتكر العيد واللبس الجديد والعيدية اللى كانت بتيجى جديدة لانج اربع على انصاص على جنيهات

انزل اشترى حاجة ساقعة ولوليتا بخمسين قرش وعشر اكياس نينجا معلش كنت مفجوعة وافتكر ايس كريم اللى عليه هدية واحد تانى وتقعد تنقى وتبص فى العصايا لماتكون بيضا اوى يبقى هتفوز والبقال لما يتعصب يقول لا مفيش كونو تانى يالله

ومسابقات كوكاكولا الجادون نجمعه  والشمعدان والبنتين التؤام اللى كانوا بيظهروا ومعرفش اشاعة لغاية دلوقتى انهم طلعوا من غير إذن والدهم على التليفزيون
افتكر بكار بكار بكار مسلسل اللى كان بيجى ساعة الفطار وطبعا بوجى وطمطم ديما بفتكر"بطنى بتوجعنى ياطمطم اه يابطنى " وهى ترد عليه حرمت يابوجى .. حرمت .. حرمت ترمرم ..حرمت 
والشعرواى الله يرحمه كل جمعة
وكان مسلسل باور رينجرز المغامرون الخمس جيسون المغامر الاحمر كان فتى احلامى 
ومسلسل ذا جيرل فروم توموروا برده البت اللى بتلبس التاج وتركز على حاجة وتحركها من مكان لمكان وتاكسى السهرة كل اتنين واخترنا لك كل اربعاء اللى كان بيجيب مسلسل اكس فيلز كان مسلسل رهيب الواحد يستناه من اسبوع لاسبوع 
وسينما الاطفال سينما سينما الاطفال سينما وذا بولد اند ذا بيوتيفول المسلسل اللى كله بيجوز بعضه
ومازنجير وكابتن ماجد سجلت الهدف ياماجد وجريندايزر اهو ده بجد فتى احلامى يوووووووووووو من هنا لبكره هفتكر حاجات كتير 

افتكر المال والبنون وليالى الحلمية اكيد كلكم سرحتم زيى وافتكرتكم ايام كانت حلوة زمان مكناش نعرف يعنى ايه مسئولية وهم وفلوس واصحاب تخدع وتخون وناس بوشين وناس بتكدب وناس مبقتش بتخاف على حد من قلبها عشان الحساس والطيب ملهوش مكان فى وقتنا الحالى

افتكر لما الشباب تفكر تعاكس يطلقون الكلب عليك وتجرى وتصرخ فى اركان الشارع

افتكر ثانوى وانى كان نفسى اطلع صحفية ودخلت علم علوم ازاى معرفش

افتكر الجامعة والدكاترة والمذاكرة وحضور المدرجات وافتكر لما دكتور بيحب كل حاجة يقولها تتكتب وافتكر ان مرة قال فى مروحة لووقعت على حد دلوقتى وكتبتها كده فى الامتحان وجبت 18/20 فى المادة دى

افتكر ايام الموبايلات اول موبايل اريكسون بتاع كبير واسود وعريض شبه الانتركم اللى بيمسكوه بتوع الامن وانك تخاف حد يفتح عليك عشان المكالمة بنص جنيه كنا نكلم على الارضى احلى كلام ونسال على بعض ولما الموبايل مكنش موجود كنت تروح فى الميعاد بالثانية مظبوط ،، الموبايل خلاك تكنسل متحبش ترد تفصل منه عشان بيصدعلك دماغك

الغريبة اننا وصلنا ان ممكن تلاتة قاعدين جنب بعض والاطفال قاعدين ماسكين الايباد وكل واحد يابيلعب جيمز ياواتس اب يافاتح النت ومالوش دعوة ومبيكلمش اللى جنبه يمكن بيرد عليه وهومش عارف بيرد يقول ايه اللى مظلوم الاباء عشان مبيعرفوش يكلموا معانا دماغنا مش معاهم وكل اللى علينا حاضر معلش طيب ثوانى اخلص اللى فى ايدى واللى عمره مابيخلص ،، حتى الجيل الجديد لماتلاقى حد خريج جديد فاهم زيك مع ان الفرق مابينكم 10 او 12 سنة تلاقيه فاهم عنك الا حاجة واحدة الاخلاق معندهمش ثقافة احترام حد بيعرفوا بعض وليهم اصحاب بس صداقة مخوخة من الداخل مشوبة انامبقتش عارفة احنا كبرنا اوى والدنيا دى مش دنيتنا ولا ياريتنا كنا فضلنا صغيرين ،،،

 رانده احمد