قابيل وهابيل

دائرة الحياة مقسومة مابين الاتنين دول 

خير وشر

عندى اقتناع تام ان الانسان جواه الاتنين شر وخير وهو عنده القدرة يختار اى اتجاه يمشى فيه الاتنين مؤمنين بربنا والاتنين عارفين الصح والغلط بس فى حد اختار يكره الخير ينقلب ضده يمشى عكس التيار يعمل اى حاجة تخلينا نقول ايه ده، ايه كمية الشر دى ، ده انت معلم بصراحة ، اكتر ناس بتقابلها فى حياتك يا فى الدراسة يا فى الشغل يافى محيط سكنك وهتلاقى نفسك بتحتك بالناس دى كتير اوى ازاى تعلم نفسك  تتعامل مع الناس دى طاقة واعصاب وتقعد تسال نفسك يوميا هى الناس دى بتعرف تحط راسها على المخدة وتنام ازاى ، ازاى عندها القدرة انها تاذى ومتتاثرش نفسيا ازاى عندها الجبروت والقوة دى ، تحالفوا مع الشيطان واداهم القوة دى فنزع من قلوبهم الحب والاحساس والجمال

هما بيشوفوا بعيونهم الجمال بيحسوا باحاسيس الناس ولا عندهم جمود اتعملوهم تغيير صمام فى القلب لاغى الاحساس ، قابيل وهابيل اخوات يعنى اقرب اتنين لبعض وسند لبعض دليل ان مفيش مستحيل ان اصحاب وعشرة عمر ينقلبوا على بعض ، مش عارفة اتكلم عن الشر عشان مش قادرة احسه ولا اعرف الناس دى بتحس بايه ، القتل " الجريمة الاولى على الارض من البشر "طب هو كان فى اساسا قتل على الارض يعنى كانت الحيوانات ، الجن بيقتلوا بعض ولا احنا بنعرف نعذب بعض اوى ونخترع وندمر بلاد عشان جاه او سلطان او فلوس

الخير ده بقى حالة روحانية ، حالة تصالح  مع النفس ، براءة وتهذيب نفس ، تفضل تحاسب نفسك مليون مرة هواناغلطت هو انا كان قصدى اضايق فلان ، جبر الخواطر ، النفس الحلوة

الخير حاجة حلوة ودائرة وبتلف وبتجيلك فى حاجات كتير بس ياريت نتعلم

وللاسف الشر بقى بيتشكل فى شكل طيب فمبقتش عارف تفرق

ملخص الحياة :-

قال تعالى (وَاتْلُ عَلَيْهِمْ نَبَأَ ابْنَيْ آدَمَ بِالْحَقِّ إِذْ قَرَّبَا قُرْبَاناً فَتُقُبِّلَ مِنْ أَحَدِهِمَا وَلَمْ يُتَقَبَّلْ مِنَ الْآخَرِ قَالَ لَأَقْتُلَنَّكَ قَالَ إِنَّمَا يَتَقَبَّلُ اللَّهُ مِنَ الْمُتَّقِينَ. لَئِنْ بَسَطْتَ إِلَيَّ يَدَكَ لِتَقْتُلَنِي مَا أَنَا بِبَاسِطٍ يَدِيَ إِلَيْكَ لِأَقْتُلَكَ إِنِّي أَخَافُ اللَّهَ رَبَّ الْعَالَمِينَ. إِنِّي أُرِيدُ أَنْ تَبُوءَ بِإِثْمِي وَإِثْمِكَ فَتَكُونَ مِنْ أَصْحَابِ النَّارِ وَذَلِكَ جَزَاءُ الظَّالِمِينَ. فَطَوَّعَتْ لَهُ نَفْسُهُ قَتْلَ أَخِيهِ فَقَتَلَهُ فَأَصْبَحَ مِنَ الْخَاسِرِينَ. فَبَعَثَ اللَّهُ غُرَاباً يَبْحَثُ فِي الْأَرْضِ لِيُرِيَهُ كَيْفَ يُوَارِي سَوْءَةَ أَخِيهِ قَالَ يَا وَيْلَتَا أَعَجَزْتُ أَنْ أَكُونَ مِثْلَ هَذَا الْغُرَابِ فَأُوَارِيَ سَوْءَةَ أَخِي فَأَصْبَحَ مِنَ النَّادِمِينَ. مِنْ أَجْلِ ذَلِكَ كَتَبْنَا عَلَى بَنِي إِسْرَائِيلَ أَنَّهُ مَنْ قَتَلَ نَفْساً بِغَيْرِ نَفْسٍ أَوْ فَسَادٍ فِي الْأَرْضِ فَكَأَنَّمَا قَتَلَ النَّاسَ جَمِيعاً وَمَنْ أَحْيَاهَا فَكَأَنَّمَا أَحْيَا النَّاسَ جَمِيعاً وَلَقَدْ جَاءَتْهُمْ رُسُلُنَا بِالْبَيِّنَاتِ ثُمَّ إِنَّ كَثِيراً مِنْهُمْ بَعْدَ ذَلِكَ فِي الْأَرْضِ لَمُسْرِفُونَ)

دائرة الانتظار

ايه يعنى انتظار؟؟؟

عادى كلمة هتعدى على ودنك مرور الكرام بس الحقيقة الانتظار ده ابشع عقاب او كلمة ممكن تسمعهاوممكن تكون ثواب ممكن تستفيد منه .

انت بتقضى 3/4 حياتك فى دائرة الانتظار ،، ازاى يعنى ؟

طيب احنا نايمين وبكره ورانا شغل ،، ساءت الاقدار انك صحيت بدرى عن معاد شغلك ومش عارف تنام تفضل تبحلق فى السقف ان الوقت يعدى عشان تلبس وتنزل تروح شغلك ده اسمه انتظار

طيب لو الشغل جنب بيتك هتتمشى او تستنى تركب حاجة توصلك ، ده انتظار

طب لو الشغل بعيد تستنى طابورتقطع تذكرة المترو ،، تستنى فى الزحمة عشان تعرف تركب وياسلام لو فوت كزا  مترو عشان تعرف تركب ، ده انتظار ؟ استهلاك للنفس والاعصاب

طب لو مفيش مترو وفى مواصلة طابور عشان تعرف تركب مكروباص او اوتوبيس " انتظار " 

لو بتتفرج على مسلسل وشدك جدا وجه الاعلان قطعه كل شوية " يخليك تكره تكمل المسلسل "

طيب مستني نتيجة امتحان امتحنته 

مستنى ترقية

مستنى زيادة مرتب 

مستنى تدخل للدكتور وقدامك ارقام كتيرة 

مستنى تشترى الدوا

مستنى اول مولود

مستنى الفرج :)

مستنى الوقت يعدى فى الشغل عشان اتخنقت وعاوز تروح 

مستنى الوقت ميعديش عشان وراك شغل كتير عاوزه يخلص

مستنى تعين حد وينزل فى معاده وخايف مينزلش

الانتظار انك تبعت سى فى وتستنى يتقال اكسبتد حددولوا معاد " خاص بقسم الاتش ار اللى شغالين على استشاريين فى قسم الميدكال "ولو نزل خايف ميكملش ويمشى وتدور على حد غيره " خاص بالاتش ار "

الانتظار فى حد ذاته الم ، توتر ، وجع اعصاب 

الانتظار فى كل مجال فى حياتك وبيمر مع الوقت كانه تؤام ليه 

فجاءة يتسرق عمرك وفجاءة تلاقى ان حياتك كلها ضاعت فى انتظار ووقت 

ببقى نفسى الاقى ستوب واتش اوقف كل دقيقة اقولها متمشيش استنى شوية ، انا عمرى بيتسرق وبيكبر ملحقتش اعمل حاجة 

طب ممكن ارجع تانى للموقف اللى حصلى من كام يوم اصلحه ،، اكبر دماغى طيب ، اعيد حساباتى 

الانتظار ممكن تستغله انك تقعد تسبح فيزيد ميزانك 

الوقت بيجرى ومش عارفة اقولكم تلحقوه ازاى 

لو صحيت متاخر هتلاقى نفسك طول اليوم بتجرى وراء الوقت مش الوقت اللى بيجرى وراك 

الانتظار ده عامل زى شريط القطر والقطر هوانت وجريان القطر بدون توقف ده الوقت 

فى ايدك توجه الوقت بس متوقفهوش 

بقلمى