هلس xهلس

والله ... بصراحة قعدت اقول اكتب ايه ،، اكلم فى ايه ،، وجبت اللاب وحطيته على رجلى وفتحت ملف وورد وقلت من اول السطر لاقتنى بكتب نىنتارتالرتاؤلاتؤءلاؤءاؤرلا ايوه بالظبط زى مانتوا شايفين ايه مش عارفين تقروا ... ده وقته اللى لابس نظارة يجيب منديل ويمسح العدسات كويس ،، واللى مش لابس يمسح اللاب او شاشة الكمبيوتر كويس ايوه مسحتوا .... حلو جداً ...نكتب تانى  ناتنساتيسالرايسلراتسلراتلرات برده مش عارفين تقروا هسهلهالكم

اللى انا كتباه ده لومت وجابوا جان فرانسوا شامبليون اللى فك رموز حجر رشيدة قصدى رشيد اصل رشيدة دى تبقى معزة بكار نأسف على الخطأ وجارى التصحيح المهم مش هيعرف يترجم اللى انا بقوله لان بصراحة كلام مش مفهوم دى مجرد تكتكة على الكى بورد زى مانمسك علبة ألوان ونشخبط بيها على الحيط او فى ورقة بنبقى عاوزين نلفت الانتباه ونقول للناس ممكن تسمعونا  ،، ساعات بنبقى عاوزين نصرخ ونعلى صوتنا ونخبط على الحيطان بس منعملش ازعاج ،، لوده جنان اتجنن ...

كلنا بنحب الضحك ومبنحبش الاكتئاب وعاوزين دايما نضحك ضحكة من القلب مش ضحكة اتولدت من الألم والحزن ومنخفش من بكره منقولش هيحصل ايه طب هشتغل هنجح هبقى ايه ،، تخيلوا لو كل واحد فينا غمض عينيه وحلم بالحاجة اللى هو عاوزها اى حاجة مهما كانت صعبة ،، هقولكم على سر خطير عارفين أحلام اليقظة .. أيوه اللى لمانقعد واحنا صاحين كده ومفتحين عينينا ،، والله آخر روقان وقرمشة ،، كلنا بنعمل كده بنتخيل حاجات محصلتش يعنى مثلا لوعندك مقابلة شغل بكره تقعد تتخيل انك لابس احلى لبس وقاعد وعمال تجاوب كل الاسئلة واتقبلت واتعينت ومكتبك جميل ،، وممكن تتخيل نفسك مطرب وواقف وكل الناس قاعدة بتسمعك واتشهرت وكله عاوز يمضى اوتوجرافات زى مانا عايشة حلم ان حد يجنن ويقرى اللى بكتبه ويبعتلى رسالة ويقولى على فكرة كتاباتك حلوة اوى وعاوزينك تكتبى فى المجلة عندنا واتشهر بقى واسافر بره براحتى بقى حلم اليقظة بتاعى الاجمل مش ان الحاجات دى مبتتحققش الاجمل اننا لسه بنحلم طول ماحنا بنحلم يبقى احنا لسه عايشين اوعوا تفقدوا الحلم اوعوا تقولوا ايه اللى جاية تعيشنا فى الخيال ده ،، على راى منير لوبطلنا نحلم نموت "

اكتر حد منبهرة بيه فيليكس آمن بفكرة وحققها اخترق حاجز الصوت ده اكيد عدى عليه ناس جابوله احباط لغاية ماكره نفسه ياعم ايه اللى انت بتقوله ده يابنى هتموت انت قبل ماهتزل ياهتموت محروق يامصدوم ياسكتة قلبية ده بقى احباط الجيل بتاعنا ،، بس احنا ناسين قصة سيدنا نوح والسفينة  لما ربنا امر سيدنا نوح ببناء سفينه لينجو بها ومن معه من المؤمنين وكان قوم نوح فى الصحراء فبدا سيدنا نوح يزرع الشجر حتى كبر ثم قطعه ونجره وبدا يصنع السفينه هو ومن معه من المؤمنين وقومه يمرون عليهم ويسخرون منه ليحبطوهم ولكنه امن بالله وامن برسالته وظل قويا رغم لوم اللائمين وسخرية الساخرين حتى انتهى من بناء السفينه ،، يعنى اكيد عدى عليه ناس وقالوا لبعض بص ده فى الصحراء هيبنى ايه ده وان شاء الله هيمشيها فى الماية ازاى .. لوفضلنا نسمع لتعليقات الناس ياااااااااااااااااا مكنش حد حقق حاجة ولا نجح فى حاجة تعرفوا تجيبوا قطنة وتحطوها على ودانكم عشان متسمعوش احباطات الناس اقولكم حاجة احسن اعملوا نفسكم مبتسمعوش دى نعمة على الاقل دايما هتفتكروا الناس بتشجعكم مع انهم فى الحقيقة بيحاولوا يحبطوكم ،،

دوروا دايما على كل حاجة بتبسطكم بداية من الشيكولاتة لكل حاجة بتخليكم مبسوطين "تفاؤلوا بالخير تجدوه"

زى ماقولتلكم الكلام مابيخلصش والجنان اكتر تصبحوا على خير