نظام ياس ونو

نظام ياس ونو

كان فى نظام لاحدى شركات الاتصالات Yes"و NO "بمعنى لما يجى حد يكلمك وانت دماغك مصدعة ومش قادر تكلم دلوقتى واتخنقت يادوب تدوس على كتف اللى قدامك زرار نو ،، الله بجد على طعم الاحساس  ده ان اى حد غلس او غتت او رخم اوبا نوقفه على طول ،، الشخص اللى قدامك يسيبك بقى او يمشى او يقف مالناش فيه ونضيف زرار كمان يوقف الصورة ياسلام بجد احلى كلام ،، يبقى عندنا نو الكبيرة هتوقف الشخص انه يقرب منك ونو الصغيرة هتخليه يقف ميتحركش لدرجة انى ممكن اضربه بالقلم بس مش هيحصل يعنى واشغل ياس واخليه يحس بلسعة الالم يعينى على لذة الإنتصار،، لو اطبق النظام الجديد ده فى المصالح الحكومية عشان نخلص بطاقة،،شهادة ميلاد ،، رخصة  أى أوراق المهم أدوس زرار نو واروح على كتف كل شخص وادوس نو نو نو نو نو نو لكل شخص واقف قدامى لغاية مااقف اول الصف واخلص ورقى بقى أومثلا تكون الدنيا زحمة وعاوزة أركب مواصلة أى حد واقف قدامى نو نو نو لغاية ماأركب وأقعد فى المكان اللى يريحنى ولو فى خناقة كبيرة أدخل بقى وأدوس نو الخناقة هتخلص أحرك الناس وأمشيها فى شوارع مختلفة ولماأدوس ياس ينسوا كانوا بيعملوا ايه أو أكون قاعدة مع شلة بنات أصحابى وفيهم واحدة غلسة وعشان القاعدة متقفلش ادوس نو ،،ولوتفكيرى شيطانى لاسمح الله أسرق أى مكان أدوس نو لاى ظابط حب يوقفنى  يااااااااااااااااااا إحساس حلو أوى انك يكون عندك باور رهيبة انك تنزل كل يوم الصبح من بيتك ومش مخنوق ولا مضايق ولا شايل هم يومك هيمشى ازاى ماهو أى حاجة مش على مزاجنا هندوس نو ومش هيبقى جوانا كبت وعشان احنا شعب بنحب الرخامة هندوس نو 24 ساعة فى الاربعة وعشرين ساعة الله زى فكرة عجبتنى مرة انك تجيب عروسة وتحط عليها صورة الشخص اللى مضايقك وتحطه فى اوضة معينة فى بيتك وتفضل تشتم وتطلع كل اللى جواك وتزعق  وتكلمه او تكلمها وتقولها انتى فاكرة نفسك ايه حرام عليكى هوانا عملتلك حاجة ايه اللؤم ده كفايا بقى وخاصة هتفيد البنات عشان احنا بنكتم مشاعرنا وبنتأثر أوى وبدل مانعيط ونقول انا تعبانة وطول الوقت نحس اننا مظلومين طب ماهو الحل موجود ،،وعلى فكرة بقى مشاكل كتير هتتحل هتقل نسبة الطلاق بدل ماالزوج يزعق لمراته ويتخانق هيدخل القوضة يهزأ مراته وهى كمان هتعمل العكس ونسبة البطالة هتقل بدل ما كل واحد يسيب الشغل بالعكس هنضحك وهننبسط وهتزيد الإنتاجية فى البلد ولو لمحنا شاب حليوة جاى من بعيد هندوس نو على كل زراير البنات عشان ميشوفش غير واحدة بس حاجات كتير لوسرحنا شوية هنعمل اكتر بكتير وهنضحك بجد ضحكة من القلب والمسألة بسيطة نبدأ يومنا بإبتسامة وزرار "نو" أتمنى ينزل السوق قريباً مع زرار نو مش هتقدر تغمض عينيك.