أصلا عادى والله

مش عارفة ابتدى منين ولا اقول ايه بس محبطة احباط السنين ،، كل لما اقف وامشى والدنيا تبتدى تنور تضلم تانى وتيجى تشتكى وتتكلم يقولك عادى ماحنا كلنا كده ،،،،،
كأن مفيش حد بقى حاسس بحد أو كأن الناس بقت مليانة هموم ومحدش بقى ناقص هم حد تانى ،، النهاردة الجمعة ٢٥ يناير ٢٠١٣ مرور سنتين على الثورة مش كلام فى السياسة على قد مابتوجع لما بسمع ان فى ناس بتموت ربنا يصبر اهاليهم وبعدين كل لما تحول القنوات كانك بتشوف سنة ٢٠١١ قدامك ايه اتعودنا على المشاهد فبقينا بنقول اصلها بقت عادى
لما تقف الصبح عشان تقطع تذكرة مترو والدنيا زحمة معلش اصلها بقت عادى
تنزل تجرى عشان تلحق مواصلة والدنيا زحمة وطبعا تجرى من هنا لهنا عشان تركب اصلها بقت عادى
لما تتاخر عن مواعيد شغلك وميدولكش اجر اضافى "هوده الشغل اذا كان عجبك " اصلها بقت عادى
لما تشوف الشحاتة بقت مهنة وتفتقر لمعانى انهم يصعبوا عليك من كتر ماشفتهم اصلها بقت عادى
انك تمشى فى الشارع بامان الله وواحد يضايقك فى الشارع عادى امشى يابنتى على طول اصل انا لوهزاته عيب دى قلة ادب ولو سكت ومشيت معلش يابنتى .... معلش ايه بالظبط ،،، هو احنا بجد فى مصر
لوركبت المترو بتحس انك مخنوق من الزحمة ياما من البائعين مش عارفين نحس بنسمة هدوء ،،، عادى بقى ماحنا كل يوم كده 
لوركبت تاكسى السواق يقعد يرغى ويكلم ياما فى السياسة او يعاكس ماهى ناقصاه .... اصلى معلش خديهم على قد عقلهم 
لوروحت السوبرماركت كلهم يتهافتوا عليك ويشيلوا الحاجة منك عشان تديهم بقشيش ،،، عادى بقى جت عليهم 
لومسكت ايس كريم وأكلته فى الشارع يجيلك حد يقولك ممكن ونبى عاوزة حتة ،،، فتدهوله  ،،، حتى دى ياربى كمان 
طبعا لوميكروباص تتمنى تلاقى فكة او محدش غلس يقعد جنبك ويستظرف عليك ،،، ماهويوم من اوله 
لما يبقى ليك اصحاب غاليين على قلبك ويلوموك فى عز تعبك وضيقك انتى مكلمتناش النهاردة ليه حاضر هعمل اون لاين لنفسى انى ابقى مبسوطة ٢٤ قراط

على راى مكى حياتنا كلها مكسات بس مش كلها بتظبط ،، ايون انا عاوزة واحد من ده عشان تظبط يوم واحد بس 

مش عارفة مسيطرة عليا حالة احباط ،، يمكن من اللى شفته فى التليفزيون النهاردة 
كلنا مضايقين تعبانين مخنقوين ،، بس كفايا كده مش قادرة اكتب ،، ماليش نفس ولا نفس ...