احساس تجربة

المقالة دى كتبتها فى 4 اغسطس 2012 اعذرونى انى نشرتها كنت فرحانة اوى بس اوضاع دلوقتى !!!!!!!!!!!!!

اعذرونى مرة تانية فاصل ونعود .......................

                                                 إحساس تجربة

أول مرة أحس بإحساس مش عارفة حتى أوصفه ،، دائما كنت اتمنى وأقول يااااااااااااااا لوالزمن يرجع بينا لايام سعد زغلول والمظاهرات ومصر مصر تحيا مصر ،،، وأرجع أفوق من شرودى وأقول لا لالالا بطلى أحلام مفيش حاجة من ديه هتحصل مظاهرات ايه وثورة ايه فوقى من الحلم وفجأة حصلت ثورة ومظاهرات ولأول مرة فى حياتى ألاقى نفسى نازلة أروح أنتخب ،، إحساس غريب اللى لو حد سألنى هتنتخبى مين أقولهم محتارة مش عارفة مش هشارك ولقيت نفسى بقول لأ لازم أتغير لازم أنزل لازم أشوف على الأقل أخوض التجربة مشيت وكنت محرجة وخايفة أعمل إيه لو قابلنى حد وقالى انتخبى حد غير اللى فدماغى بعد ماتعبتنى واستقريت على حد وألاقى نفسى هتخانق معاه وأقول متحجرش على صوتى لا انا حرة وأعيش دور لبنى عبد العزيز فى فيلم أنا حرة تأليف العظيم إحسان عبد القدوس وإخراج العبقرى صلاح أبو سيف وبعدين فقت لقيت نفسى فين ياجماعة مدرسة كذا الاقى سيدات بتقولى على ايديك اليمين يابنتى وقابلت العسكرى والشرطى ودخلونى تخيلت إنى هلاقى ناس واقفة بتقول لناس تانية انتخب فلان وإن فى هرج ومرج استغربت واستغربت أكتر لما لقيت ناس بسيطة وتجمهر من الستات مبيحصلش غير لو قالولهم فى عرسان ههههههههههههههه أو حتى فى جمعية استغربت من ثقافتهم واختلاف كل واحدة فى اسماء المرشحين وتكتم البعض انه ميقولش مين المرشح قلت معقول ده هما حاسين نفس احساسى حاسين ان لاول مرة بنقول راينا فى حاجة مش خايفين حاسين باحساس لما بنكسب فى ماتش وعنينا تدمع متعرفش بدمع ليه ودخلت واديت صوتى والراجل يقولى حطى ايدك فى الحبر من غير مايقول انا غرقت صباعى كانى كنت فرحانة مكنتش اعرف ايه سبب انى احط ايدى فى الحبر بس عرفت السبب او معرفتهوش كده كده كنت هحط ايدى فى الحبر بس كنت عاوزة اصرخ وارفع ايدى واقول للناس كلها انا انتخبت خرجت ومشيت ومكدبش عليكوا واعزورونى كنت كل شوية احط ايدى على جبينى وشوية على انفى قال يعنى بمسح حاجة والحقيقة كنت بحطها عشان الناس كلها تعرف انى انتخبت ياجماعة انا مش محدثة نعمة انا محدثة تجربة ،، تجربة لاول مرة بعيشها اول مرة بانتخب اول مرة باختار سواء كان غلط او صح كنت عاوزة اشاركم احساسى اخترت صوت ممكن يكون قليل اللى هينتخبوه فقرية هقول ايه اصل بحب الناس اللى جواها لسه خير وطيبة اكتر انسان حسيته فانتخبته مش مهم يكسب المهم اديته صوتى مع ان فى مرشحين تانين بس هو اسمه خالد اعزورونى مرة تانية معلش اعزارى كترت انى بقول اسمه حبيت اقول انى فخورة بنفسى انى انتخبته مع ان حمدين صباحى انسان محترم وكتير عاوزين ينتخبوه بس بحس بانقباض فى قلبى معرفش ليه اما عمرو موسى بحسه اكسلنس ليه معرفش وابو الفتوح بحس احساس غريب اعزرونى مرة اخرى انه شاف كتير فى حياته لدرجة انى مش عارفة هيقدر يساعد مصر ولا لأ اما شفيق راجل كانه عسكرى الواحد واحد مش واحد ونص أنافخورة ان فى بلدى انتخابات مفيهاش تزوير ان فى ديمقراطية انا اخترت خالد اخويا وابويا اختاروا حمدين اختى عمرو موسى واختى التانية ابو الفتوح مع اننا فى بيت واحد بس كل واحد اختار وكل واحد مفرضش رايه عن التانى ماهوبيتنا صورة صغيرة من بيت كبير يسكنه ناس كتير والناس الكتير بيشتغلوا فى منظمات اللى هى فى الاخر جزء مصغر من المجتمع ............ أنا مصرية ،،، أنا أنتخب ،،، أنا إمرأة.