ريموت كنترول

ريموت كنترول

دائما نشرد بأذهاننا ونشعر بشئ من الخوف ،، نشعر بفقدان شئ ما !!!! ماهو لا أعلم .....

نريد الانعزال عن العالم ،، كلاً منا يمر بهذه المرحلة ،، نحتاج أحياناً إلى يد تلمس علينا تشعرنا بالدفء ... قديكون هذا هو الشعور أو يد ما تطبطب على قلوبنا ....

كل منا يشعر كأننا مثل اللذين رقصوا على السلم .. لا قدروا يطلعوا فوق ولا قدروا ينزلوا تحت ،، من منا لم يشعر بألم ،، من منا لم ينتابه احساس انه ثابت فى مكانه مش عارف يخطو خطوة للامام او يعاود الرجوع مرة اخرى للخلف ويدلف الى الوراء .. اصله مينفعش ... اسمحولى هكلم باللغة العامية

مينفعش بعد ماطلعت الخطوات دى انزل تانى مينفعش طب اطلع فوق بس ، فوق عالى عليا اوى هقدر ولا مش هقدر طب هومفيش حد جنبى يقدر يساعدنى مفيش حد ياخد بايدى ويطلع معايا سلمة سلمة ولا هفضل لوحدى واقف فى مكانى مستنية ياموجة هواء شديدة تزقنى ياريح قوية بس ممكن اقع ولو وقعت هنكسر ولو انكسرت صعب اتصلح وارجع تانى .

يالله انه شعور الياس الذى ينتابنا من آن إلى اخر لا نرى منفذ للحياة كانها ممر ضيق نمر فيه طويل شاق متعب يشبه اللون الرمادى ،، من منا لم يقف لكى يتلمس خطواته من منا لم يسأل نفسه هل أنا فى الطريق الصحيح أم الخطأ ،، من منا لم يلقى أخطائه على الاخرين ،، من منا لم يحادث نفسه ا " ايه الحظ النحس ده " - نعيب زماننا والعيب فينا ... وما لزماننا عيب سوانا ،

أصل فلان السبب لومكنش مشانى من الشغل كنت وصلت ،، اصل فلانة بتقول عليا كلام مش صح ،، يوووووووووووووو اشمعنا انا ياربى اللى بيحصلى كده ،، لا ده فلان بيغير منى ،، هوالمدير ده بيزعقلى كده ليه واشمعنا مش بيزعق لده ... إنها النفس البشرية التى يصعب دائما فهمها !!

مفيش حد من اصحابى بيسمعنى كل واحد بيبقى عاوز يحكى همه وحد يسمعه ومش مهم اللى قدامه ،، كل اصحابى مش بلاقيهم لما احتجهم ،، إحساس إنك تقف جنب حد وتساعده وتوقفه على رجليه وهو اصلا مكنش حاجة وبعد ماتطبطب على قلبه وتساعده يتفرعن واول حد فكر يدوس عليه هواول حد مدله ايده هو أنت نعم ،،،،

كم مرة وثقنا فى اشخاص ،، كم مرة اتمنينا الموت عشان مش قادرين نستمر فى الحياة دى ،،

كم مرة قولنا اصل انا لومعايا واسطة كنت وصلت وبقيت ايه ....... لوانا معايا كذا وكذا كنت بقيت ايه اصل الدنيا مظاهر  ،، وعشان انا مش معايا كذا وكذا  يداس عليا ....

موازين غريبة وناس أغرب ،، اكيد قابلتوا ناس غلط فى وقت غلط فى ساعة غلط فى يوم غلط ،، كم مرة سالت نفسك يااااااااااااااااا لوكنت قابلت الناس دى فى بداية حياتى كانت حياتى اختلفت ،، كم مرة قولت لنفسك او شفت بعينك ناس ملهاش شغلة غير انها تنقل الاخبار للمدير ومع انها لاعندها قدرات ولا خبرات بتوصل وبتاخد مرتبات وانت بيداس عليك عشان ماشى بمايرضى الله ....

قعدت فكرت كتير طب ايه الحل ،، ايه ده ؟؟؟؟؟؟؟؟؟؟؟؟؟؟؟؟

قولت اجيب ريموت كنترول ،، تخيلوا معايا كده لوكل واحد معاه ريموت كنترول بتاعه

ريموت كنترول فى زرار باك للرجوع للخلف " هرجع حاجات مكنتش عجبانى فى نفسى واغيرها وهرجع لحظات حلوة مريت بيها وامشيها بالبطئ هعيد ترتيب المواقف واغيرها هدوس على ديليت "زرار الحذف" واحذف كل لحظات الالم اللى حستها هحذف كل الاشخاص اللى شفتهم واثروا عليا بالسلب هدوس على زرار الجرى وهسرع فترات الامتحان كانت بتعملى قلق جامد جدا ،، هدوس على زرار الامام عشان اشوف ايه اللى يحصلى قدام حاجات كويسة فتدينى دفعة وابطل حالة الاحباط وهبص على كل ارقام الريموت وهرقم كل رقم حسب ترتيب اولوياتى ،، كلنا عارفين تسلسل هرم ماسلو للاحتياجات

بس انا هختلف معاه هرقم رقم واحد حسب اولوياتى انا براحتى بقى هرمى وانا حرة فيه ،، المهم كل واحد يرقم حسب ماهو عاوز ماهو الريموت كنترول بتاعكم نسيتوا ولا ايه ؟؟؟؟
مثلا الشغل رقم 2 مثلا الدراسة رقم 3 الاهل 4 الاصدقاء وهكذا كل رقم هيكون ليه مدلول عندى وهكذا ياااااااااااااااااا ريموت السحر هيغيرلى كل حاجة هقدر اتحكم فى حاجات كتير بس لو الريموت ده ضاع وحد غيرى لاقاه واتحكم فى حياتى ولا الريموت اللى معايا باظ من كتر الاستعمال من كتر مابدوس اغير حاجات واشيل واقدم اقدر اجبله قطع غيار ،، اسئلة كتير ملهاش حصر ولا عدد طب هومين اللى بيتحكم فى حياتنا دلوقتى مش انا وانت وكل واحد فينا المشكلة فينا احنا ،، اناعارفة ان كل واحد فينا سأل نفسه هى ليه الناس مبتحسش بقيمتنا غير لما خلاص نكون ضعنا منهم والقلب اتملى تراب منهم ،، عارفة السؤال هتقولوا اشمعنا فى ناس حياتها حلوة ومبيحصلهمش ربع اللى حصلنا مع اننا شايفنهم من بره انهم عاديين ،، الرد سهل محدش فينا دخل حياتهم شايفين براويز من بره جميلة وحلوة بس محدش دخل جواها وشاف ايه اللى هما فيه ،،، الرد بسيط

الله " موزع الارزاق مدينى ريموت كنترول ،، رادار جوانا يقولنا اللى بنعمله ده صح ولا غلط ... الضمير

معتقدش اى حد فينا قبل مايعمل اى تصرف بيشوف ده يرضى ربنا ولا لأ ممكن يجراله حاجة وحشة الا لو كان اختبار للصبر والابتلاء

طب نبصلها من وجهة نظر تانية انا كويسة ومبنامش ومبفكرش انى أأذى حد بيحصلى كده ليه ،، طب منقولش ليه حالنا احسن من ناس تانية منقولش على الاقل احنا بناكل وبنشرب وبنشتغل وفى غيرنا عايش على حاجة واحدة بس طب ماتيجى نفكر بشكل تانى واحنا فى لحظات الاحباط نجيب ورقة وقلم نكتب نفسنا نعمل ايه السنادى نتوكل على الله ونقول هنعمل كذا وكذا وكذا اكتبوا اى حاجة شايفينها سهلة تتحقق وحاجات مستحيل تتحقق

وحطوها فى الدرج فى اى حتة بس مكان تعرفوه وتعالوا بعد كام شهر شوفوا حققتوا قد ايه من اللى كتبتوا ارسموا حلم لصورة عاوزين تحققوها صدقونى فى لحظات الضيق هتفتكروا دايما الصورة دى هيفضل عقلكم مربوط باللى كتبتوا ومشغول انكم تحققوه وحتى لو لقيتوا نفسكم محققتوش حاجة اكتبوا تانى اهداف او حتى نفس الاهداف بس حطولها تاريخ يعنى بعد 3 شهور عاوز اخد كورس كذا خلال سنة اخلص قراية 100 كتاب وان شاء الله هتحققوها وادعولى ....

لا الحزن بيدوم ولا الفرح بيدوم ماهى الدنيا احنا عايشين فيها ضيوف مش اقامة يا نمر عليها مرور الكرام ونسيب بصمة يانفضل تايهين

اوعوا تنسوا ان ربنا موجود وقادر يطبطب على قلب كل موجود سبحانه وتعالى رب العباد

كلنا بنمر بنفس المشاكل بس فى ناس بدوس على الالم وبتحوله لأمل

بحبكم عشان انا منكم وليكم
معلش هكمل وقت تانى ماماعاوزانى انام عشان ورايا شغل بكره .....